Wadau waipongeza PURA usimamizi mzuri wa ushiriki wa wazawa

Wadau wa shughuli za mkondo wa juu wa petroli wameipongeza Mamlaka ya Udhibiti Mkondo wa Juu wa Petroli (PURA) kwa usimamizi mzuri inaoufanya katika kuhakikisha Watanzania wanapewa vipaumbele vya ajira katika miradi mbalimbali inayoendelea kwenye shughuli hizo.

Pongezi hizi zinakuja baada ya Mamlaka kuhakikisha wafanyakazi wa kigeni kwenye nafasi mbalimbali katika mradi wa ukarabati wa visima Songo Songo wanaondolewa na nafasi zao kuchukuliwa na Watanzania, hususani zile ambazo hazihitaji ujuzi wa juu.

Akitoa taarifa hiyo wakati wa kikao baina ya Mamlaka na wadau kilichofanyika hivi karibuni jijini Dar es Salaam, Mshauri wa Sheria wa Kampuni ya Exalo SA ambayo ndiye Mkandarasi wa ukarabati huo, Bi. Lightness Mmbaga alieleza kuwa kuanzia Februari  2022 wafanyakazi wa kigeni wa nafasi za ‘roustabouts’ wataondoka kwenye mradi huo na nafasi hizo zote kuchukuliwa na wazawa.

Aliongeza kuwa kwasasa katika mradi huo kuna jumla ya wazawa 29 na raia wa kigeni 24, huku wafanyakazi wa nafasi za ‘floormen’ (5), ‘derrickmen’ (2) na ‘assistant driller’ (1) wakiingia kwenye kundi la wachimbaji (drillers) kuanzia Februari 1.

Naye Afisa wa masuala ya ushiriki wa wazawa (local content) kutoka kampuni ya PanAfrican Energy Ltd ambayo ndiyo mwendeshaji wa kitalu cha Songo Songo, Bi. Rehema Shija ameipongeza PURA kwa kufuatilia kwa ukaribu masuala yote hususani yahusuyo ajira kwenye utekelezaji wa miradi mbalimbali ili Watanzania wapate kipaumbele kwa nafasi zilizopo.

“Hii inatufanya sisi waendeshaji wa kitalu kuendelea kufatilia wakandarasi ambao tunawapa tenda za shughuli mbalimbali za miradi kuhakikisha wanafuata sheria na kanuni za ushiriki wa Watanzania kwenye shughuli za mkondo wa juu wa petroli,” aliongeza.

Kwa upande wake mwanachama wa Chama cha Wafanyakazi wa Mafuta na Gesi (OGAWOGA) Bw. Salim R. Sultan alieleza kuwa wamefurahia hatua hiyo ya Exalo kuweka Watanzania kwenye kazi zilizokuwa zinafanywa na raia wa kigeni na kwamba hiyo ni changamoto kubwa kwa wazawa kuonesha uwezo wao katika utendaji kazi.

“Nafasi hizi za kazi ni fursa kwetu Watanzania kuonesha uwezo wetu na uzoefu wa kazi kwenye sekta hii, tunaamini nafasi hizi zitaendelea kuongezeka kwa wazawa ili kuiletea tija nchi yetu,” alifafanua.